Corsi d’aranés

Es nòsti corsi

D’ençà dera publicacion des Normes Ortografiques der Aranés siguec de besonh aufrir corsi d’aranés tà perméter qu’es persones interessades podessen apréner a escríuer era lengua. En an 1986 se comencen a organizar corsi tà alfabetizar as aranesi ena sua pròpria lengua qu’enquia aqueth moment s’auie escrit sustot en grafia felibrenca. Es naues normes se heren seguint es critèris deth lingüista occitan Alibert, coetanèu deth catalan Pompeu Fabra, e se caracterizen per èster hètes damb critèris etimologics. Pòc a pòc se ve eth besonh d’aufrir ara poblacion d’Aran corsi d’aranés non sonque d’ortografia senon tanben corsi tà apréner a parlar era lengua, besonh qu’aumente quan se pren consciéncia de qu’er aranés, present ena escòla, a tanben d’èster present en tota era societat se vò subrevíuer en un contèxte de minorizacion progressiva dauant  dera fòrta preséncia dera lengua der Estat, eth castelhan e tanben, pòc a pòc deth catalan, coma lengua oficiau en Catalonha. Andues compden, sense dobte, damb plan mès mieis qu’er aranés e era situacion de diglòssia se hè cada viatge mès evidenta.

Damb era restitucion deth Conselh Generau d’Aran, era maxima institucion aranesa, amassa damb era Generalitat de Catalonha, assumissen era competéncia der ensenhament e impuls sociau dera lengua. Eth Conselh  ei era unica institucion que pòt expedir certificats oficiaus d’aranés. En conseqüéncia, organize corsi d’aranés aquiu a on se demanen, damb es unics requisits d’auer un minim de persones interessades (entre 8 o 10 persones) e que se pogue auer possibilitat de compdar damb un o ua professor o professora que pogue impartir eth nivèu o nivèus sollicitadi. Se comence a crear materiau didactic tà impartir classes d’aranés e s’organizen corsi de 60 ores d’octobre a mai, dues ores setmanaus autant tà apréner a parlar coma tà escríuer era lengua.

Pr’amor dera pandèmia, s’inicièren es corsi telematics.  Pòc a pòc, era intencion ei qu’es corsi agen era dobla modalitat (on line e presenciau) tà dar cobertura a totes es persones que desiren optar per estudiar aranés e hè’c coma sigue mès convenient e facil tada eres.

Actuaument compdam damb 5 nivèus d’Aranés

Se pòden organizar corsi de convèrsa se i a demana.

Dates des pròves oficiaus d’aranés

Edicte publicat en BOE sus es dates e convocatòries des pròves d’aranés, nivels, certificats y excepcions de pagament.

Important: Es duplicats des certificats d’aranés les cau sollicitar per instància generica ena web deth Conselh Generau d’Aran. (Temps minim de demora: 10 dies).

Totes es persones qu’agen hèt es es sòns estudis ena Val d’Aran (Primària e ESO) e que, per tant, pòden acreditar qu’an corsat era assignatura d’aranés, an dret a sollicitar eth certificat de Nivèu B1 en Conselh Generau d’Aran.

A mès, s’an corsat era assignatura d’aranés en Bachelierat, pòden sollicitar eth certificat de Nivèu B2.

Autant tà sollicitar eth certificat de Nivèu B1 coma eth de B2 an d’aportar era següenta documentacion:

  • Libre d’Escolaritat a on i son es assignatures corsades en cada cors de Primària o se non se pòt aportar aguest libre, un certificat dera Secretaria dera Escòla a on demore clar que s’i a corsat era Primària e s’a hèt damb era assignatura d’aranés.
  • Expedient Academic o certificat dera Secretaria der Institut d’Aran (ESO/ Bachelierat) a on demore ben clar que s’a hèt era assignatura d’aranés.

Tà hèr era sollicitud des certificats o de duplicats de certificats oficiaus s’a de hèr a trauès d’Instància generica dera web deth Conselh Generau d’Aran. (Minim de demora: 10 dies obrants)

En Conselh Generau d’Aran cercam persones que poguen hèr classes presenciaus e/o telematiques d’aranés entà adults!

Auem de besonh compdar damb ua borsa de persones que poguen dar responsa ara demana per part dera poblacion d’apréner era nòsta lengua.

Per aguest motiu, totes aqueres persones que pensetz que podetz optar a ensenhar lengua aranesa  en bèth un des nivèus  que s’aufrissen des deth Conselh Generau d’Aran: A1, A2, B1 e B2, vos podetz méter en contacte damb er Airau de Lengua deth Conselh Generau d’Aran.

Requisits

  • Disposar deth Certificat deth Nivèu C1
  • Presentar eth vòste CV
  • Presentar per escrit ua unitat didactica adequada ath nivèu o nivèus des quaus voleríetz hèr classes. Se pensatz que podetz hèr classes de toti es nivèus, auríetz de premanir ua unitat de cada nivèu.
  • Explicar es unitats didactiques dauant  d’ua comission evaluadora exposant era didactica e metodologia que se seguirie damb er alumnat . (maxim 10 minutes per unitat).
  • Assistir tà ua entrevista personau.

Edicte pel qual es convoquen les proves per a l’obtenció dels certificats d’aranès/occità del Departament de Cultura e Lengua del Conselh Generau d’Aran, curs 2023/2024.

This site is registered on wpml.org as a development site.