Volontariat per Aranés

Parles aranés e vòs ajudar a practicar-lo?

S’ès volontari

  • Ajudaràs ar aprenent o aprenenta a lançar-se a parlar en aranés e a auer mès fluïditat.
  • Facilitaràs que sigue en contacte damb era cultura aranesa. Ajudaràs a integrar en territòri.
  • Non son classes d’aranés. Non cau cap de titulacion ne èster expèrt/a.

Vòs parlar aranés damb facilitat?

S’ès aprenent…

  • Practicaràs e apreneràs aranés en un ambient relaxat damb ua persona que lo parle abituaument.
  • Apreneràs vocabulari e expressions quotidianes.
  • Coneisheràs de prumèra man era cultura aranesa e gent que jamès auesses coneishut.

Intègra er aranés ena tua vida

  1. Complèta era ficha d’inscripcion  o inscriu-te presenciaument en Conselh Generau ( de 8:00 a 15:00).
  2. Atau formaràs part deth Volontariat per Aranés!
  3. Des deth Departament de Lengua deth Conselh Generau proposaram ar aprenent/a un volontari/ària qu’age disponibilitat e ja podetz començar a practicar, quan volgatz e a on volgatz! En modalitat presenciau o virtuau.

En modalitat presenciau o virtuau.

“Eth volontariat m’a ajudat a auer mès fluïditat, trapi es paraules facilment e pogui mantier ua convèrsa normaument”

Quauques opinions d’aprenents e volontaris

“Eth volontariat m’a ajudat a auer mès fluïditat, trapi es paraules facilment e pogui mantier ua convèrsa”

“Ei ua manèra fòrça agradabla de conéisher aranesi e hèr-te coneishut”

“Aconselhi participar, pr’amor qu’ei una grana causa tà pèrder era vergonha”

“Ei ua activitat gratificanta e te permet conéisher d’autes persones e cultures”

“Ei ua experiéncia interessanta”

Materiau de supòrt: De qué podem parlar?

Activitats  e recomanacions – Grop de convèrsa

T’agradarie practicar aranés en un grop redusit?

Escriu-mos tà lengua@aran.org e podem organizar un grop en foncion dera demanda. Passaràs ua bona estona parlant aranés!

Volontariat per Aranés ei un programa que promò eth volontariat lingüistic, de manèra que persones que parlen abituaumnet aranés destinen ua part deth sòn temps a conversar damb persones interessades en practicar-lo, aquerir fluiditat e incorporar-lo de forma naturau as activitats quotidianes, ath trabalh o enes relacions sociaus.

Era convèrsa

Eth programa propòse de hèr un minin de 10 ores de convèrsa, repartides en 1 ora per setmana apuprètz.

Er objectiu des trobades ei mantier ua convèrsa sense tension a on es persones aprenentes se trapen a gust e animades a participar ; non se tracte pas de recéber ua leçon. Ei convenient qu’es intervencions deth volontari l’animen a parlar.

Ei important qu’era persona aprenenta parle mès qu’era volontària. Era volontària ja parle ben era lengua e qui a de practicar ei era aprenenta.

Rebrembatz qu’entà aquerir fluiditat auetz de mantier es convèrses en aranés des deth prumèr moment.

Dubtes de volontaris e aprenents

Qui serà era mia parelha lingüistica?

Ua persona que d’ua manèra altruista auferís eth sòn temps entà parlar-te tostemp en aranés. Se trigue en foncion des donades que cada un a metut en formulari d’inscripcion que cau aumplir entà participar-i: era disponibilitat orària, eth lòc, era edat, es afeccions.

De qué auem de parlar?

De causes quotidianes, dera actualitat, de libres, de pellicules, de viatges, de païsi, de codina, de vida familiara, deth trabalh, deth passat, deth futur, de projèctes… Guardatz mès enjós es Tèmes de convèrsa que vos suggerim. Podetz hèr activitats com ara ua passejada, visitar un lòc o pòble. Tanben podetz hèr era lectura de bèth tèxte e comentar-lo…

S’auetz de besonh materiau de supòrt, en Airau de Politica Lingüistica deth Conselh Generau d’Aran, vo’n podem facilitar.

Com mos coneisheram?

Facilitaram eth telefon que volgatz entà méter en contacte volontari e aprenent.

A on mos auem de trobar?

A on volgatz, e s’auetz de besonh un lòc tanben vo’lo podem facilitar.

Tèmes de convèrsa

Presentacions: com te dides?, d’a on ès? Guaire temps hè que viues ena Val d’Aran ?. Era tua família…

Localizacions: demanar e indicar a on ei un lòc o un servici…

Qué vos agrade: hèr espòrt, eth cinema, viatjar, gésser damb es amics, anar tara montanha, dormir, codinar, navegar per internet…

Activitats quotidianes: era ora, es repèishi, eth trabalh, guardar era tele …

Es notícies dera setmana: dera Val d’Aran e deth mon.

Recomanar ua pellicula, un libre…

Qué as hèt aué? demanar e explicar qué as hèt aué, qué haràs deman, tàs vacances…

Com vos trobatz? Malauties, estats d’anim, conselhs…

Costums des païsi: hèstes tradicionaus, gastronomia, jòcs, lòcs emblematics de cada pòble…

Conselhs

Suggerim as volontaris de non interrompir guaire damb correccions: er objectiu dera convèrsa ei poder practicar era lengua, mès que non pas corregir errors.

Corregir massa provòque interrupcions que trinquen eth hiu dera convèrsa ara persona aprenenta e li pòden crear inibicion, er objectiu dera convèrsa ei que se tròbe a gust e animada a participar, mès que non pas corregir-li es errors.

Vau mès hèr es correccions indirèctament, repetint de manèra corrècta aquerò que s’age dit mau damb ua frasa o question: introdusitz era repeticion damb ua frasa, com ua part naturau dera vòsta intervencion a continuacion dera sua, hènt-li ua question, demanat-li detalhs, o metent-i objeccions.

Per exemple

Aprenent/a: « Jo sonque dormisqui ben en mèn lit »

Vonlontari/ària : « Tu sonque dormisses ben en tòn lhet ? »

Er aprenent a de díder ath volontari com se sent damb era manèra qu’a de corregir-lo : voleríetz que vos corregisse mès soent o dilhèu non tant?; vos va milhor que vos corregisque en moment der error o quan ja ajatz acabat era vòsta intervencion. Parlatz-ne… Rebrembatz qu’era persona volontària non ei eth professor.

Intercambiatz cultura. Hètz amics.

Pòs consultar eth còdi de bones practiques deth programa “Volontariat per aranés”

Formulari d´avaloración e satisfaccion

Vos arregraïríem que responéssetz aguest formulari d’avaloración e satisfaccion e mos héssetz a arribar totes es critiques, suggeréncies e idies que volgatz entà poder corregir errors e milhorar.

FORMULARI D’AVALORACION E SATISFACCION
Se nos as completat eth nombre minim d’ores (10), as intencion de completar-les ?

Valoracion des aspèctes organizatius

(puntua der 1 ath 5: 1 mau, 2 regular, 3 corrècte, 4 ben)
Era campanha de difusion:
Satisfaccion damb es recomanacions:
Assignacion des parelhes:
Aspèctes entà valorar s’ès volontari/a (mèrca es aspèctes que considères mès positius)
Aspèctes entà valorar s’ès aprenent/a (mèrca es aspèctes que considères mès positius)
Volontariat per aranés a complit es tues expectatives?
Politica de privacitat
Processament de dades
Acceptacion de publicitat

Introduccion

Eth còdi de bones practiques des professionaus, institucions e organizacions que poguen trebalhar en programa « Volontariat per aranés » (VxA) vò èster equivalent a un còdi deontologic. Atau donc, ei un ensemble de normes e déuers de trebalh que genère entath collectiu de professionaus, collaboradors e participants deth programa era obligacion de coneisher-les e de seguir-les.

Mos proposam eth besonh qu’eth programa VxA age aguest tipe de marc regulador de practiques e actituds,

  1. Perque era experiéncia acumulada ath long de 4 ans de gestion deth programa “Voluntariat per la llengua” entath catalan e eth trebalh damb mès 14.000 parelhes, a demostrat eth besonh de reflexionar sus es actuacions e es actituds de cada ua des parts que i intervien.
  2. Perque ei un programa a on i participen persones de sèxe, origina, ideologies, expectatives, motivacion e caracteristiques diferentes.
  3. Perque metem en contacte, en interaccion cara a cara, persones que non se coneishen e qu’an diferenti nivèus de comprenença der aranés e volem qu’aguesta experiéncia sigue positiva entà qu’es dues artenhen es objectius que mèrque eth programa.
  4. Perque eth programa se base en esperit altruista des persones e ena confiança mutuau, que son valors especifics deth volontariat que volem mantier.
  5. Perque un des objectius deth programa ei reforçar es actituds positives envèrs er usatge dera lengua e evitar qu’es persones que saben aranés càmbien de lengua sense besonh.
  6. Perque un aute des objectius ei milhorar eth benestar des persones volontàries que s’i inscriuen. Entàs ues, milhorant eth sòn grad de competéncia orau en lengua aranesa, e entàs autes, constatant que podem mantier convèrses en aranés damb persones qu’an ua auta lengua d’origina.
  7. Perque ei important qu’es persones qu’intervien en programa ne coneishen era filosofia e non se genèren fausses expectatives.
  8. Perque es institucions qu’an era responsabilitat dera gestion, seguiment e devolopament deth programa an d’assegurar es principis de respècte, garantia de drets e confidencialitat.
  9. Perque segontes era legislacion vigenta, es persones que participen en programa coma volontàries an de veir protegides es sues donades personaus e era sua imatge.
  10. Perque aguest ei un programa premiat pera Union Europèa com ua des milhors bones practiques entà apréner idiòmes en 2005 e, per aquerò, cau garantir que continue estant un modèl de referéncia.

Consideracions entàs organismes oficiaus que gestionen eth programa

Aguest ei un programa possat peth Conselh Generau d’Aran que se desvolope en territòri dera Val d’Aran, per miei deth personau destinat exclusivament a desvolopar-lo, en Airau de Politica Lingüistica deth Departament de Cultura deth Conselh Generau d’Aran.

Aguest ei un programa basat ena implicacion volontària des persones e dera societat civiu, e cap d’entitat ne institucion non se lo pòt hèr sòn en exclusiva, perque se tracte d’un projècte de toti, deth conjunt dera societat aranesa.

Per tot açò, eth Conselh Generau d’Aran e es professionaus que lo gestionen son reponsables deth sòn corrècte foncionament e de balhar es recorsi de besonh e es mesures entà garantir eth succès e era sostenibilitat deth programa, e entà hèr eth seguiment adequat entà garantir era satisfaccion des persones, es organizacions que i collabòren, entà qu’aguesti siguen es prumèrs difusors dera bontat deth programa.

  • Eth Conselh e es professionaus que lo gestionen son obligadi a garantir era confidencialitat des donades personaus deth volontariat. Es donades recuelhudes des persones participants en aguest programa sonque se pòden utilizar damb aguesta finalitat, e es adreces postaus e electroniques sonque s’utilizaràn entà enviar informacion de besonh entara bona marcha deth programa.
  • Eth Conselh e es professionaus que gestionen eth programa an de mantier ua complèta discrecion sus aspèctes particulars que hèsquen referéncia as entitats e as persones volontàries e sauvar-les ua estricta confidencialitat.
  • Eth Conselh a de garantir qu’es persones volontàries seràn cubèrtes per ua assegurança de responsabilitat civiu eth temps qu’actuen coma volontaris o volontàries o participant en activitats culturaus, sociaus, etc. relacionades damb eth programa. Aguesta assegurança a de dar cobertura tota era setmana (cap de setmana tanben) e a de garantir tanben es responsabilitats derivades des maus hèti a tercèrs.
  • Eth Conselh e es professionaus an de velhar peth benestar deth volontariat en desvolopament deth programa, per tant an de garantir qu’es lòcs de trobada que recomanen agen condicions adequades. Concernent as condicions des lòcs de trobada trigadi librement pes aprenents e aprenentes, sonque eri ne son es responsables.
  • Eth Conselh a de dar responsa as consultes e es dobtes des persones, entitats e organizacions que i participen.
  • Eth programa ei basat en respècte mès absolut as idies, opinions, tendéncies e creeences de tot tipe des persones volontàries que i participen. VxA vò esténer e promòir es usi e es valors dera lengua aranesa, mès enlà de ideologies, opinions, creences, enes quaus non a d’entrar ne interferir. Es professionaus que lo gestionen an d’auer en compde aguest aspècte e l’an de respectar.

Consideracions entàs persones que participen coma volontàries

Totes es persones adultes que parlen aranés pòden participar en programa Volontariat per Aranés, sense que siguen discriminades per rason de sèxe, religion, creença, origina, etc. Totun, es persones que participen en programa VxA an de seguir escrupulosament ua actitud civica e de respècte cap as autes persones. Totes es persones que participen en programa VxA an garantida era proteccion des sues donades personaus, d’acòrd damb aquerò que determine era legislacion vigenta.

  • Totes es persones que participen en programa coma volontaris an de respectar era ideologia, es creences e es opinions dera persona o es persones damb qui interactue.
  • Totes es persones que participen en programa pòden demanar trobar-se damb ua persona diferenta dera que se les a assignat en un principi, se i a bèra incompatibilitat manifèsta qu’atau ac demane.
  • Es persones que participen en programa coma volontàries parlants d’aranés non an d’actuar coma professors o professores de lengua, senon coma facilitadors de convèrsa en aranés.
  • Es persones que participen en programa VxA coma aprenents an de veir en era auta persona ua facilitadora de convèrsa, non un professor o professora d’aranés.
  • Es persones que participen en programa coma volontàries an de recéber era informacion, preparacion e orientacions de besonh entà desvolopar eth sòn ahèr en programa e eth supòrt que les calgue, de part des professionaus e es institucions que lo gestionen.
  • En programa VxA, es persones que i participen pòden parlar de quaussevolh tèma qu’acòrden. Eth programa se base ena confiança mutuau e eth contengut des convèrses s’a de mantier ena confidencialitat. Es volontaris e es volontàries non pòden hèr us dera informacion que receben en aguestes convèrses, sense eth coneishement explicit deth volontari o volontària que l’age expressat.
  • Es persones que participen en programa s’an de comportar de manèra neutrau, respècte as persones que son es sues interlocutores, des des punt de vista ideologic e religiós.
  • Totes es persones que participen en programa coma volontàries se comprometen a seguir es bones practiques descrites. Se non se complissen, es persones responsables dera organizacion pòden decidir descartar-les deth programa. En aguest cas, tostemp calerà informar per auança as persones volontàries sus eth programa que s’age pogut generar.

Consideracions entàs organizacions que i participen

Eth papèr des organizacions sense finalitat de lucre coma collaboradors en aguest programa ei fòrça important. S’expòse a diferents nivèus :

  1. Era possibilitat qu’organizen eth programa entre es sòns associats, com ua activitat mès
  2. Era possibilitat qu’apòrten volontaris e volontàries, entà que des deth programa se gestione era formacion de parelhes e eth sòn seguiment
  3. Era possibilitat qu’es entitats i collabòren desvolopant actuacions de sensibilizacion, supòrt e dinamizacion culturau entath volontariat.
  • Es organizacions que i participen ac an de hèr des dera perspectiva que contribuïssen de manèra altruista a promòir es usatge der aranés en en cap de cas non l’an d’enténer ne utilizar com ua plataforma de captacion de sòcis o clients.
  • Es organizacions que i participen an de seguir en tot moments es critèris qu’a mercadi eth programa (nòm de marca, caracteristiques, etc.) e non les pòden modificar sense era autorizacion exprèssa des organismes oficiaus des quaus depen eth programa.
  • Es organizacions que i participen an de tier en compde qu’eth programa se base en respècte mès absolut as idies e creences de tot tipe des volontaris e es volontàries que i participen. « Volontariat per Aranés » vò esténer e promòir er usatge es usi e es valors dera lengua aranesa, mès enlà des idiologies o creences particulars. Es organizacions e es establiments que lo gestionen an d’auer e compde aguest aspècte e respectar-lo.
  • Es organizacions que i participen se comprometen damb un programa de domeni generau qu’a uns critèris de comunicacion determinadi. Quan ua organizacion o un establiment volgue difóner era sua activitat particular en relacion damb eth programa, ac a de hèr d’acòrd damb es critèris generaus.
  • Eth comportament des organizacions a d’èster neutrau, des deth punt de vista etic, ideologic, politic e religiós.

“Ei ua activitat gratificanta e te permet conéisher d’autes persones e cultures”

This site is registered on wpml.org as a development site.