Eth Conselh Generau hè a conéisher es naues publicacions en aranés en motiu deth dia de Sant Jòrdi

  • Eth govèrn d’Aran presente, damb motiu deth Dia deth Libre, es naues publicacions en aranés: “Es simbèus d’Aran”, d’Angel Claveria Aner, que se presente aguesta tarde ena sedença dera maxima institucion aranesa e “Es tresaurs deth bòsc”, de Pere Martí i Bertran, que s’aufrirà as escòles araneses

  • Atau madeish, ena web der aranés se pòden descargar dejà eth recuelh d’òbres premiades ena XXIau edicion deth Prèmi Aran de Literatura enes categories de narracion, poesia e novèlla juvenila; e aué s’aufrís tanben un conde orau entara mainadèra dera Escòla Mairau de Vielha

En motiu deth Dia deth Libre, er Airau de Lengua deth Conselh Generau d’Aran vos presente es naues publicacions en aranés entà totes es edats:

Aran de Literatura, recuelh d’òbres premiades ena XXIau edicion deth Prèmi Aran de Literatura, que vos podetz descargar ena web der aranés: aranes.conselharan.org, remasse es dètz òbres premiades en 2021 enes categories de narracion, poesia e novèlla juvenila.

Es simbèus d’Aran, òbra d’Angel Claveria Aner, ei eth recuelh des nòsti simbèus: eth drapèu, er imne e er escut d’Aran e de cada un des sòns pòbles.

Es tresaurs deth bòsc, un conde de Pere Martí i Bertran sus era riquesa que mos da era natura, revirat per Míriam Arjó, s’aufrirà as escolans de dusau e tresau des escòles araneses e lo podetz crompar ena web de Pagès editors.

Eth Conselh Generau d’Aran tanben aufrís aué un conde orau, titolat “Eth pet mès gran deth mon”, entara mainadèra dera Escòla Mairau de Vielha, explicat per Carla Rodríguez.

Vielha, 23 d’abriu de 2024
cvillar

Tags: Lengua, Publicacions

Newsletter:

Darrèrs posts

Tanben te pòt interessar

This site is registered on wpml.org as a development site.