Preambul

Es crabetes e eth lop ei ua animacion interactiva hèta a partir d’un conde liejut pes escolans deth CEIP de Salardú en 1996. Formaue part deth projècte ME CONDES UN CONDE?, damb materiau educatiu elaborat peth Centre de Recorsi Pedagogics dera Val d’Aran. Siguec ua coproduccion deth Departament d’Ensenyament dera Generalitat de Catalunya, eth Conselh Generau d’Aran, Catalunya Ràdio, Institut d’Estudis Ilerdencs, La Caixa e Caixa d’Estalvis i Pensions de Barcelona.

Aguest document audiovisuau e interactiu s’a desvolopat actuaument a compdar dera cinta d’àudio e eth dossièr escrit e editat entà liéger e trabalhar era comprenença deth conde. Entà implementar era part animada, visuau e interactiva s’an dessenhat es personatges deth conde e tota era part grafica de besonh. Eth document compren tres blòcs: un prumèr a on se pòt escotar eth conde damb es imatges, un dusau entà liéger eth tèxte e un tresau entà respóner es qüestions sus era narracion.

Damb aguesta edicion interactiva s’a volut recuperar e profitar documents sonòrs existents que damb lèu trenta ans ja an ua valor istorica e antropologica ena normalizacion der aranés. Per aquerò, entà èster fidèls as àudios, s’an conservat irrelevants errors de lectura o prononciacion e s’an mantengut particularitats gramaticaus e lexicaus dera part baisha dera Val d’Aran com ara “bòt” tà “bot”, “per baish” tà “per dejós”, eth pronòm “es” en compdes de “se” (es met a dormir) e eth pronòm “et” en compdes de “te” (non et daurim).