Arribe era quatau temporada dera sèria en aranés ‘Èm çò qu’èm’

  • Aguest dijaus, 5 d’octobre, entàs 22:55 ores s’emeterà eth prumèr capitol dera quatau temporada d’aguesta sèrie que, impulsada peth govèrn deth Conselh Generau d’Aran dera man de Lleida TV, cerque prebotjar era normalizacion lingüistica der aranés a trauès dera ficcion e er umor

  • Damb motiu d’aguesta estrea, eth govèrn d’Aran a organizat un acte de presentacion dera naua temporada, qu’aurà lòc eth madeish dijaus entàs 19:00 ores ena sedença deth Conselh Generau

Eth pròplèu dijaus, 5 d’octobre, aurà lòc era estrea dera quatau temporada dera sèrie en aranés ‘Èm çò qu’èm’, impulsada peth govèrn deth Conselh Generau d’Aran dera man de Lleida TV a trauès dera productora audiovisuau Kionalia Project. Damb motiu d’aguesta estrea, eth govèrn d’Aran a organizat un acte de presentacion dera naua temporada, qu’aurà lòc eth madeish dijaus entàs 19:00 ores ena sedença deth Conselh Generau.

“Deth govèrn d’Aran ençà èm plan satisfets d’anonciar era estrea d’aguesta quatau temporada, ua apòsta creativa entà impulsar era promocion e normalizacion dera nòsta lengua pròpria a trauès d’aguest format e de naues formules entà apropar era lengua as mès joeni”, afirmaue era sindica d’Aran, Maria Vergés.

Un còp mès, aguest producte audiovisuau torne a apostar pera ficcion e er umor entà prebotjar era normalizacion lingüistica der aranés e, a trauès de diuèrsi gags, tractarà es errors e dubtes mès comuns qu’apareishen en emplec abituau dera lengua pròpria d’Aran, damb era finalitat d’apropar era lengua a un public extens en un format pòc explotat enquiara.

“Damb aguesta produccion non sonque trabalham ena normalizacion dera lengua, senon que tanben dam visibilitat ath gran talent que i a ena Val d’Aran”, asseguraue era sindica d’Aran, ath temps qu’arregraïe a totes es persones que i an participat “era sua dedicacion e volontat de collaborar en impuls der aranés”.

‘Èm çò qu’èm’, s’estree aguest dijaus e compdarà damb 12 capitols d’ues 5 menutes que s’emeteran cada dijaus setmanaument entàs 22:55 en Lleida TV  e tàs 18:22 es diuendres en La Xarxa.

2 d’octobre de 2023
cvillar

Tags: Audiovisuau, Lengua

Newsletter:

Darrèrs posts

Tanben te pòt interessar

This site is registered on wpml.org as a development site.